O'zbekiston Markaziy banki tomonidan e'lon qilingan hisobotga ko'ra, 2025-yilning II choragida mamlakat ko'chmas mulk bozorida faollik I chorak oxirida kuzatilgan tezlashuvdan so'ng nisbatan barqarorlashdi. Bu haqda regulyatorning navbatdagi tahliliy sharhida ma'lum qilindi.

Joriy yilning aprel-iyun oylarida jami 74,4 ming dona ko'chmas mulk oldi-sotdi shartnomalari rasmiylashtirildi. Bu ko'rsatkich o'tgan yilning aynan shu davri bilan deyarli bir xil bo'lib, o'sish atigi 0,1 foizni tashkil etdi. Bu raqamlar bozordagi talabning ma'lum darajada barqarorlashganini ko'rsatadi.

II chorakda ko'chmas mulk narxlari o'sishda davom etdi, biroq o'sish sur'atlari iqtisodiy faollik va aholi daromadlari dinamikasiga nisbatan mo'tadil bo'lib qoldi. Iyun oyida ko'p qavatli uylardagi kvartiralarning birlamchi bozordagi narxi o'tgan yilga nisbatan so'mda 6,2 foizga, dollarda esa 12 foizga oshdi. Ikkilamchi bozorda ham shunga o'xshash tendentsiya kuzatilib, narxlar so'mda 6,3 foizga, dollarda 12,2 foizga ko'tarildi.

Markaziy bank mutaxassislarining ta'kidlashicha, birlamchi va ikkilamchi bozorlardagi deyarli bir xil narx dinamikasi uy-joyga bo'lgan talabning barqaror shakllanayotganidan dalolat beradi. Hisobotda qayd etilishicha, hududlarda narxlar Toshkentga qaraganda tezroq o'sgan. Bu holat hududlardagi narx bazasining pastligi, aholi daromadlarining ortishi, shuningdek, qurilish va investitsiya faolligining kengayishi bilan izohlanadi.

Poytaxtda esa II chorakda yer uchastkalari narxining yillik pasayishi davom etdi. Iyun oyida 100 kv.m yerning o'rtacha taklif narxi taxminan 292 million so'mni tashkil etib, bu o'tgan yilning iyun oyiga nisbatan 9 foizga arzonroqdir. Bu Toshkentdagi yer bozorida talabning pasayganini yoki taklifning ko'payganini ko'rsatishi mumkin.

Source: uznews.uz