Jizzax viloyatida “Sirojiddin media” loyihasi rahbari va taniqli bloger Sirojiddin Odilovga nisbatan sud hukmi o‘qildi. Mirzacho‘l tuman sudi uni tovlamachilik hamda firibgarlik jinoyatlarini sodir etganlikda aybdor deb topib, to‘rt yil muddatga ozodlikdan mahrum etish jazosini tayinladi. Mahkum jazoni manzil-koloniyada o‘taydigan bo‘ldi.

Sud materiallariga ko‘ra, Odilov bir fuqarodan tovlamachilik yo‘li bilan 12 million so‘m undirgan bo‘lsa, yana ikki kishidan aldov yo‘li bilan tegishlicha 30 million va 33 million so‘m mablag‘ni qo‘lga kiritgan. Yetkazilgan jami moddiy zarar 75 million so‘mni tashkil etgan. Jizzax viloyat sudining ma’lum qilishicha, sud jarayonida ushbu zarar to‘liq qoplangan.

Sud majlislarida himoya tomoni Odilovning aybini mutlaqo tan olmadi. Joriy yilning 24-sentabr kuni bo‘lib o‘tgan majlisda davlat ayblovchisi blogerga 6 yil ozodlikdan mahrum qilish jazosini so‘ragan edi. Biroq advokatlar va jamoat himoyachilari uning to‘liq oqlanishini talab qildilar. Yakunda sudya muddatni qisqartirib, to‘rt yillik jazo tayinlashni lozim topdi.

Ma’lumot o‘rnida, Sirojiddin Odilov shu yilning mart oyida Samarqand shahrida huquq-tartibot idoralari tomonidan ushlangan edi. Uning ustidan sud jarayoni 20-iyul kuni Jizzax shahar sudida boshlangan, keyinchalik ish qo‘shimcha o‘rganish va ko‘rib chiqish uchun Mirzacho‘l tuman sudiga yuborilgan edi.

Source: podrobno.uz