Buxoro viloyatida voyaga yetmagan shaxsning erkinligini noqonuniy cheklash va unga nisbatan shafqatsiz jismoniy zo‘ravonlik qo‘llash bilan bog‘liq mudhish hodisa yuz berdi. Bolalar ombudsmani ma’lumotlariga ko‘ra, mahalliy fuqaro o‘z qizi bilan ko‘rishish niyatida kelgan 17 yoshli yigitni tanishlari yordamida majburan olib qochib, unga og‘ir tan jarohatlari yetkazgan.

Aniqlanishicha, voqea joriy yilning 28-avgust kuni sodir bo‘lgan. Viloyatda istiqomat qiluvchi fuqaro E.R. qizi O.D. bilan uchrashish uchun kelgan 2009-yilda tug‘ilgan voyaga yetmagan E.O.ni uning ixtiyoriga zid ravishda avtomobilga o‘tqazgan. Shundan so‘ng uni o‘z qarindoshi F.F.ning xonadoniga olib borib, u yerda to‘plangan boshqa shaxslar ishtirokida o‘smirni ayovsiz kaltaklagan.

Hodisadan so‘ng o‘tkazilgan tergovga qadar tekshiruv doirasida sud-tibbiy ekspertizasi tayinlangan. Tekshiruv xulosalariga ko‘ra, jabrlanuvchi E.O.ning tanasida turli darajadagi jiddiy tan jarohatlari borligi rasman qayd etilgan va unga yetkazilgan shikastlanishlar hujjatlashtirilgan.

Mazkur holat yuzasidan 7-sentabr kuni E.R. va F.F.ga nisbatan O‘zbekiston Respublikasi Jinoyat kodeksining 137-moddasi 2-qismi “a, v” bandlari (Bir guruh shaxslar tomonidan voyaga yetmagan shaxsni o‘g‘irlash) hamda 105-moddasi 2-qismi (Qasddan badanga o‘rtacha og‘ir shikast yetkazish) bo‘yicha jinoyat ishi qo‘zg‘atildi. Hozirda tuman prokuraturasi dastlabki tergov harakatlarini olib bormoqda va holat Bolalar ombudsmani tomonidan to‘liq nazoratga olingan.

Source: www.gazeta.uz