Gazeta nashrining "Ta’lim 360" nomli maxsus podkastining navbatdagi sonida O‘zbekiston maktablaridagi o‘qituvchi fenomeni, pedagoglarning jamiyatdagi real o‘rni hamda ta’lim tizimidagi mavjud muammolar chuqur tahlil qilindi. Muhokamada ta’lim eksperti Komil Jalilov, pedagog Shokir Tursun hamda Abdulla Avloniy nomidagi pedagogik mahorat milliy instituti rektori Abduvali Ismoilov ishtirok etib, sohadagi og‘riqli nuqtalarga to‘xtalib o‘tdilar.

Suhbat davomida ekspertlar o‘qituvchining ta’limdagi asosiy vazifasi va uning evolyutsiyasini muhokama qilishdi. Komil Jalilovning fikricha, o‘qituvchi ta’lim tizimining markazida turadi va har qanday islohotning muvaffaqiyati bevosita unga bog‘liq. An’anaviy yondashuvlarda o‘qituvchi faqat bilim beruvchi ekspert sifatida ko‘rilgan bo‘lsa, zamonaviy progressiv qarashlarga ko‘ra, u o‘quvchining tanqidiy fikrlashini rivojlantiruvchi fasilitator yoki hamkorga aylanishi lozim. Biroq amaliyotda o‘qituvchilarning qo‘li bog‘langan bo‘lib, ular qat’iy belgilangan taqvim rejalar va darsliklardan chetga chiqa olishmaydi.

Shokir Tursun o‘qituvchining asosiy vazifalariga ta’limni loyihalash, jarayonni tashxis qilish va bolalarda ichki motivatsiya uyg‘otishni kiritish kerakligini ta’kidladi. Biroq amaldagi tizim o‘qituvchilarga darsni o‘zlari loyihalashtirishga imkon bermasligi, har bir qadam qat’iy nazorat qilinishi o‘qituvchining ijodiy salohiyatini so‘ndirib qo‘yayotganini bildirdi. Uning so‘zlariga ko‘ra, o‘qituvchiga faqat darslikdagi tayyor materialni o‘tish majburiyati yuklangani uning funksiyalarini atrofiyaga uchratmoqda.

Rektor Abduvali Ismoilov esa so‘nggi yillarda davlat tomonidan o‘qituvchilar uchun yaratilayotgan sharoitlar, yangi malaka oshirish dasturlari va xalqaro TALIS tadqiqoti natijalariga urg‘u berdi. Uning aytishicha, o‘qituvchilarning 95 foizi o‘z kasbidan mamnunligini bildirgan va bu ijobiy tendensiyadir. Shunga qaramay, ekspertlar bu yuqori ko‘rsatkich ko‘proq o‘qituvchilarning o‘tmishdagi og‘ir majburiy mehnat sharoitlari bilan taqqoslagandagi nisbiy ijobiy o‘zgarish ekanini, mutlaq mukammallikni anglatmasligini qayd etishdi.

Source: www.gazeta.uz