Poytaxtimizning Chilonzor va Uchtepa tumanlarida istiqomat qiluvchi aholi uchun noqulayliklar yuzaga kelishi kutilmoqda. Ma'lum qilinishicha, kelgusi kuz-qish mavsumiga tayyorgarlik ko'rish hamda tarmoqlardagi nosozliklarning oldini olish maqsadida rejalashtirilgan profilaktika ishlari boshlab yuborildi.

Mas'ul idoralarning ta'kidlashicha, mazkur chora-tadbirlar issiqlik tarmoqlari va uskunalarining sovuq kunlarda barqaror hamda uzluksiz ishlashini ta'minlashga qaratilgan. Shu munosabat bilan, 12-oktabrdan boshlab besh kun davomida mazkur ikki tumanning qator mahallalarida issiq suv ta'minoti vaqtincha to'xtatilishi ma'lum qilindi.

Xususan, Chilonzor tumanining Al-Xorazmiy, Bektoʻpi, Guliston, Bahoriston, Sharaf, Sharq, Sharq tongi, Xayrobod, Yakkatut, Xirmontepa, Katta Xirmontepa, Kichik Xirmontepa, Shuhrat, Mehrjon, Mevazor, Boʻrijar, Botirma, Fidokor, Zarqoʻrgʻon, Katta Navbahor, Navbahor, Koʻtarma, Qatortol, Choʻponota, Nafosat, Diyor, Xalqlar doʻstligi, Dilobod, Beshchinor, Lutfiy va Yakkabogʻ mahallalarida vaqtinchalik uzilishlar kuzatiladi.

Shuningdek, Uchtepa tumanining Guzar, Qoʻrgʻontepa, Xuroson, Zargarlik, Koʻhna Choʻpon-Ota, Bogʻiston, Bogʻobod, Birlik, Nayman, Farhod, Tinchlikobod, Vatan, Vatanparvar, Hamdoʻst, Nurobod, Shirin, Diyor, Alixon Toʻra Sogʻuniy, Diyorobod, Yangi yoʻl, Foziltepa, Zulfizor, Xurshid, Koʻrkamobod va Quyi Darxon mahallalarida ham issiq suv bo'lmasligi aytilmoqda. Shahar ma'muriyati yuzaga kelgan vaqtinchalik noqulayliklar uchun fuqarolardan uzr so'raydi.

Source: kun.uz