Toshkent shahrining Farg‘ona yo‘li ko‘chasida umumiy uzunligi 6 kilometrni tashkil etuvchi uchastkada har ikki yo‘nalishda maxsus «A» yo‘laklari harakatini nazorat qiluvchi yangi kameralar o‘rnatildi. Bu haqda Yo‘l harakatini tashkil etish markazi ma'lum qilib, poytaxtda jamoat transporti ustuvorligini ta'minlash yo‘lidagi navbatdagi qadam tashlanganini bildirdi.

Markaz vakillarining ta'kidlashicha, shahar ko‘chalarida avtobuslar harakatiga qulaylik yaratish maqsadida shunga o‘xshash nazorat vositalari bosqichma-bosqich boshqa hududlarda ham joriy etilmoqda. Mutaxassislar bitta avtobusda 50 nafardan ortiq yo‘lovchi bo‘lishi mumkinligini, ruxsatsiz harakatlanib, yo‘lakni to‘sib qo‘ygan haydovchilar esa o‘nlab odamlarning vaqtini o‘g‘irlashini eslatib o‘tdilar.

Hozirgi kunda amaldagi qoidalarga ko‘ra, soat 06:00 dan 23:00 gacha tegishli huquqqa ega bo‘lmagan transport vositalarining «A» yo‘laklaridan harakatlanishi qat'iyan taqiqlanadi. O‘zbekiston Respublikasining Ma'muriy javobgarlik to‘g‘risidagi kodeksiga binoan, mazkur qoidabuzarlik uchun 1 bazaviy hisoblash miqdori (440 ming so‘m) miqdorida jarima belgilanadi.

Agar shunday holat bir yil davomida takroran sodir etilsa, huquqbuzarga nisbatan 3 baravar miqdorida, ya'ni 1,32 million so‘m jarima qo‘llanilishi ko‘zda tutilgan. Rasmiylar ushbu choralar poytaxt yo‘llarida tirbandliklarni kamaytirish va jamoat transporti jadvaliga qat'iy rioya etilishini ta'minlashga xizmat qilishini ta'kidlashmoqda.

Source: uznews.uz