Oʻzbekistonda qishloq xoʻjaligi sohasini qoʻllab-quvvatlash va issiqxona xoʻjaliklarini rivojlantirishga qaratilgan muhim qaror imzolandi. Mamlakat rahbari tomonidan imzolangan ushbu hujjatga muvofiq, issiqxona xoʻjaliklari qoʻshilgan qiymat soligʻi (QQS) va foyda soligʻidan ozod etildi, bu esa tadbirkorlar uchun sezilarli yengillik yaratishi kutilmoqda.

Qabul qilingan qaror tafsilotlariga koʻra, asosiy daromadi issiqxonachilikdan shakllanadigan korxonalar uchun ijtimoiy soliq stavkasi 1 foizga tushirildi. Shuningdek, yer va mulk soliqlari miqdori 50 foizga kamaytirilib, tarmoq vakillarining moliyaviy yukini kamaytirishga alohida eʼtibor qaratildi.

Bundan tashqari, energiya samaradorligini oshirish maqsadida oktabrdan mart oyigacha boʻlgan davrda “yashil” issiqxonalarning elektr xarajatlarining 50 foizi davlat tomonidan qoplab berilishi belgilandi. Toshkent viloyatining ayrim tumanlarida esa tomorqasida issiqxonasi boʻlgan aholi qatlamiga maxsus subsidiyalar ajratilishi koʻzda tutilgan.

Source: kun.uz