Toshkent shahrining Uchtepa tumanida yirik miqdordagi mablag‘larni talon-toroj qilish bilan bog‘liq navbatdagi kiberjinoyat fosh etildi. Huquq-tartibot idoralari xodimlarining tezkor harakatlari natijasida 19 ta tadbirkorlik subyektining bank hisobvaraqlaridan qariyb ikki milliard so‘m miqdoridagi mablag‘ni o‘g‘irlagani gumon qilinayotgan shaxs qo‘lga olindi. Tergoh ma'lumotlariga ko‘ra, mazkur shaxs bank operatori qiyofasida ish ko‘rib, pul o‘tkazmalaridagi texnik xatoliklarni bartaraf etish bahonasida kompaniyalar mablag‘lariga yashirincha kirish huquqiga ega bo‘lgan.

O‘zbekiston Respublikasi Ichki ishlar vazirligining Kiberjinoyatga qarshi kurashish departamenti tarqatgan ma'lumotlarga tayanilsa, gumonlanuvchi Toshkent viloyatida tug‘ilgan 29 yoshli shaxs bo‘lib chiqdi. Ta'kidlanishicha, u ilgari ham bir necha bor sudlangan bo‘lib, o‘zining jinoiy faoliyatini davom ettirgan holda, o‘zini pul o‘tkazmalari ilovalaridagi nosozliklarni tuzatuvchi bank xodimi sifatida tanishtirgan.

Jabrlangan tadbirkorlar o‘zlarining muammolari bilan Telegram messenjeri orqali ushbu shaxsga murojaat qilishgan. Gumonlanuvchi ularga texnik yordam ko‘rsatishni va'da qilib, maxsus dasturiy ta'minot yordamida korxonalarning bank hisoblaridagi mablag‘larni o‘zlashtirib olgan. Hozirgi kunda mazkur holat yuzasidan tegishli moddalar bo‘yicha jinoyat ishi qo‘zg‘atilib, tergov harakatlari davom ettirilmoqda.

Source: podrobno.uz