Toshkent shahrining Muqimiy ko'chasi bo'ylab oqib o'tuvchi Anhor kanalining ayrim qismlarida suv ta'minoti to'xtab qoldi, bu esa suv sathining keskin pasayishiga sabab bo'ldi. Vujudga kelgan bu kutilmagan vaziyat ekologlar va mahalliy aholi o'rtasida haqli xavotirlarni keltirib chiqarmoqda, chunki suvning qisqarishi ekologik muvozanatga jiddiy putur yetkazmoqda.

Ekologuz ixtisoslashgan kanalining ma'lumotlariga ko'ra, suv ta'minotining to'xtashi oqibatida Anhor kanalining ayrim qismlarida kichik suv havzalari hosil bo'lib, ularda tirik baliqlar qolib ketgan. Agar mas'ul tashkilotlar vaziyatga zudlik bilan aralashmasa, mazkur kichik suv o'zanlaridagi baliqlar yaqin kunlarda nobud bo'lishi mumkin.

Mutaxassislar va ekologik jamoatchilikvakillari mas'ul idoralarni muammoli hududni zudlik bilan o'rganib chiqishga, baliqlarning holatini baholashga hamda ularning qirilib ketishining oldini olish uchun kechiktirib bo'lmaydigan choralarni ko'rishga chaqirmoqda. Xususan, baliqlarni xavfsiz tarzda tutib, boshqa mos suv havzalariga ko'chirish imkoniyatini ko'rib chiqish taklif etilmoqda.

Ushbu tadbirlar tegishli ruxsatnomalar mavjud bo'lgan taqdirda va o'rnatilgan talabchlarga qat'iy rioya qilgan holda amalga oshirilishi lozim. Eslatib o'tamiz, avvalroq poytaxtdagi Salar kanalida ham baliqlarning ommaviy nobud bo'lish holati qayd etilgan edi, bu esa shahar suv obyektlaridagi nazorat yetarli emasligidan dalolat beradi.

Source: podrobno.uz