Oʻzbekiston Respublikasi Prezidenti Shavkat Mirziyoyev 17-oktabr kuni Xitoy Xalq Respublikasi Davlat kengashi bosh vaziri Li Siyang boshchiligidagi nufuzli delegatsiyani qabul qildi. Muzokaralar chogʻida ikki tomonlama koʻp qirrali strategik sheriklik munosabatlarini yanada chuqurlashtirish hamda amaliy hamkorlikni kengaytirishning asosiy yoʻnalishlari atroflicha koʻrib chiqildi.

Davlat rahbarining matbuot xizmati maʼlumotlariga koʻra, tomonlar “yashil” energetika, kimyo sanoati, geologiya, avtomobilsozlik, metallurgiya, qishloq xoʻjaligi va infratuzilmani modernizatsiya qilish kabi sohalardagi loyihalarni muhokama qildilar. Shu bilan birga, zamonaviy texnologiyalarga alohida eʼtibor qaratilib, tinch atom, raqamli texnologiyalar, sunʼiy intellekt, mashinasozlik hamda robototexnika yoʻnalishlarida aloqalarni kengaytirish muhimligi alohida qayd etildi.

Uchrashuvda mintaqaviy ahamiyatga ega boʻlgan “Xitoy – Qirgʻiziston – Oʻzbekiston” strategik temir yoʻli qurilishi jadal surʼatlarda borayotgani taʼkidlandi. Ushbu xalqaro koridorning toʻliq ishga tushirilishi savdo aylanmasini keskin oshirish va mintaqaning tranzit salohiyatini mustahkamlashga xizmat qiladi. Bundan tashqari, turizm, taʼlim va madaniyat sohalaridagi almashinuvlarni ragʻbatlantirish maqsadida ikki mamlakat yirik shaharlari oʻrtasida toʻgʻridan-toʻgʻri aviaqatnovlarni koʻpaytirish kelishib olindi.

Qayd etish joizki, tinch atom energetikasi sohasidagi muloqot alohida ahamiyatga ega. Prezident Shavkat Mirziyoyev bir kun avval mamlakatda ikkinchi va uchinchi atom elektr stansiyalarini qurish masalasi yangi hamkorlar bilan muhokama qilinishini maʼlum qilgan edi. Ilgariroq Serbiya yetakchisi Aleksandr Vuchich Oʻzbekiston rahbari bilan suhbatiga tayanib, Toshkent ikkinchi AES qurilishini aynan Xitoy bilan birgalikda amalga oshirish niyatida ekanini bildirgan edi.

Source: kun.uz