Qashqadaryo viloyatining Qamashi tumanidagi Chim mahallasida infratuzilmani yaxshilash, tadbirkorlikni qo‘llab-quvvatlash hamda yangi ish o‘rinlarini yaratish maqsadida 55 milliard so‘m miqdorida mablag‘ ajratildi. Amalga oshirilgan keng ko‘lamli loyihalar natijasida hududda yangi korxonalar faoliyati yo‘lga qo‘yilib, ishsiz fuqarolar ish bilan ta'minlandi va 5,5 mingdan ortiq mahalliy aholining turmush sharoiti sezilarli darajada yaxshilandi.
Hududga tashrif buyurgan O‘zbekiston Prezidenti Shavkat Mirziyoyev amalga oshirilgan investitsiya loyihalari va ularning amaldagi natijalari bilan yaqindan tanishdi. Davlat rahbari mahalla hayotidagi o‘zgarishlarni ko‘zdan kechirib, aholi bilan muloqot qildi.
Qayd etilishicha, ajratilgan mablag‘larning salmoqli qismi ijtimoiy infratuzilmani rivojlantirishga yo‘naltirildi. Xususan, Chim mahallasida 640 o‘rinli zamonaviy maktab hamda 240 o‘rinli bolalar bog‘chasi qurib bitkazildi, mahalla va yoshlar markazlari foydalanishga topshirildi, shuningdek, madaniyat istirohat bog‘i barpo etildi. Buning barobarida, 4,5 kilometrlik yo‘llar ta'mirlanib, elektr energiyasi va sug‘orish tizimlari to‘liq yangilandi.
Shuning bilan birga, hududda kichik biznes va xususiy tadbirkorlikni rivojlantirishga alohida e'tibor qaratilmoqda. Xususan, xotin-qizlar bandligini ta'minlovchi gilamchilik va kashtachilik yo‘nalishiga 3,5 milliard so‘m investitsiya kiritildi. Qariyb 20 ta xonadonda umumiy maydoni 36 sotqini tashkil etuvchi issiqxonalar o‘rnatildi, shuningdek, qishloq xo‘jaligi mahsulotlarini saqlash uchun 200 tonnalik sovutkichli omborxona qurildi.
Mahalliy aholi limon yetishtirish bilan bir qatorda, daraxtlar orasida kartoshka, brokkoli va ko‘katlar ekib daromad topmoqda. Fuqarolarga urug‘lik, ko‘chat va o‘g‘itlar yetkazib berilib, mutaxassislar tomonidan amaliy yordam ko‘rsatilmoqda, yetishtirilgan hosil esa kafolatlangan narxlarda sotib olinmoqda. Bugungi kunda Chimda faol tadbirkorlar soni 70 nafarga yetdi, qo‘shimcha ravishda yana 20 ta korxona o‘z ishini boshladi.
Source: podrobno.uz