Joriy yilning 7-noyabridan boshlab O‘zbekistondan Afg‘onistonga Termiz shahri orqali amalga oshiriladigan yuk tashish jarayonlariga qo‘shimcha to‘lovlar va yig‘imlar belgilandi. "O‘zbekiston temir yo‘llari" aksiyadorlik jamiyati tomonidan o‘rnatilgan yangi tariflar temir yo‘l hamda avtomobil transportida yetkazib beriladigan barcha turdagi yuklarga tatbiq etilib, masofa hamda yuk turiga qarab turlicha hisoblanadi.

Kompaniyaning rasmiy bayonotida ta'kidlanishicha, mazkur qaror daromadlar yo‘qotilishining oldini olish va moliyaviy barqarorlikni ta'minlash zarurati bilan izohlanmoqda. Qo‘shimcha to‘lovlar O‘zbekiston stansiyalaridan Termiz shahri va keyinchalik Afg‘onistonga yo‘naltiriladigan Termiz-port hududigacha bo‘lgan masofani qamrab oladi.

Yangi qoidalarga ko‘ra, aksariyat turdagi yuklar uchun temir yo‘l orqali tashishda har bir vagon uchun 800 ming so‘mdan 1,3 million so‘mgacha, avtomobil transportida esa 2,8 million so‘mdan 7,6 million so‘mgacha qo‘shimcha yig‘im olinadi. Bug‘doy mahsulotlari uchun esa alohida va yuqoriroq tariflar belgilangan bo‘lib, temir yo‘lda 6,8 milliondan 26 million so‘mgacha, avtomobilda esa 33 million so‘mgacha yetishi mumkin.

Shuningdek, Termiz-port stansiyasi orqali jo‘natiladigan yuklar uchun ham qo‘shimcha to‘lovlar joriy etildi. Unga ko‘ra, ko‘pchilik mahsulotlar uchun vagon boshiga 3 milliondan 8 million so‘mgacha, bug‘doy uchun esa 13 milliondan 33 million so‘mgacha mablag‘ talab etiladi. Barcha ko‘rsatilgan summalar qo‘shilgan qiymat solig‘ini (QQS) o‘z ichiga olmaydi.

Source: podrobno.uz