O‘zbekiston Respublikasi Prezidenti Administratsiyasi rahbari Saida Mirziyoyeva viloyat narkologiya muassasasiga tashrif buyurib, sohadagi mavjud ahvolni shaxsan o‘rgandi va eng muammoli yo‘nalishlarda islohotlarga start berdi. Mazkur tashrif mamlakatda tibbiy-ijtimoiy yordam ko‘rsatish tizimini takomillashtirish yo‘lidagi muhim qadam sifatida baholanmoqda.

Tashrif yakunlariga ko‘ra, respublikada yagona tizimni yaratish rejalashtirilgani e'lon qilindi. Unga ko‘ra, profilaktika, davolash va reabilitatsiya jarayonlari ko‘p tarmoqli mutaxassislar jamoasi boshqaruvi ostida yagona mexanizm sifatida ishlashi ta'minlanadi. Bu yondashuv tibbiy yordam sifatini sezilarli darajada oshirishi kutilmoqda.

Saida Mirziyoyeva o‘z so‘zida bazaviy davolash sharoitlari va tibbiyot xodimlarining malakasi bilan bir qatorda, bemorlarni sog‘lom hayotga qaytarishda samimiy qo‘llab-quvvatlash va insoniy e'tibor ham muhim rol o‘ynashini alohida ta'kidladi. Uning fikricha, qaramlikka yo‘liqqan kishilar yordam so‘rashdan qo‘rqmasliklari hamda o‘z muammolari bilan yolg‘iz qolmasliklari shart.

Narkologiya xizmatini kompleks yangilash maqsadida mahalliy va xalqaro ekspertlar ishtirokida tarmoqni tubdan o‘zgartirishga qaratilgan maxsus dastur ishlab chiqiladi. Bo‘lajak o‘zgarishlarning asosiy ustuvor yo‘nalishi etib inson qadr-qimmatini himoya qilish hamda bemorlarning sog‘lom hayotga qaytish yo‘lida ularni har tomonlama qo‘llab-quvvatlash belgilandi.

Source: podrobno.uz