Boku harbiy sudi sobiq Togʻli Qorabogʻ davlat vaziri, tadbirkor Ruben Vardanyanni 20 yil ozodlikdan mahrum qilishga hukm qildi. Bu haqda davlat agentligi Azertag xabar berdi. Ilgari ayblov tomoni umrbod qamoq muddatini talab qilgan edi.

Sud jarayoni 2025-yil yanvar oyida Bokuda boshlangan. Davlat nomidan jabrlanuvchi sifatida Ozarbayjon Vazirlar Mahkamasi apparati rahbari Rufat Mammadov chiqqan boʻlib, u prokuratura tomonidan taqdim etilgan dalillarga roziligini bildirib, sudni ularni qaror qabul qilishda hisobga olishni soʻragan.

Vardanyanning oilasi hukmni "dahshatli, lekin kutilgan" deb atadi. Qarindoshlarning soʻzlariga koʻra, sud jarayoni yopiq eshiklar ortida oʻtgan, ayblovlarga oid dalillar esa taqdim etilmagan. Ular, shuningdek, tadbirkor va siyosiy mahbus deb hisoblagan boshqa arman mahbuslarini ozod qilish uchun kurashish niyatida ekanliklarini bildirdilar.

Vardanyan — tadbirkor va investor boʻlib, Forbes jurnali versiyasiga koʻra eng boy rossiyalik tadbirkorlar qatoriga kirgan. 2022-yil kuzida u rossiya fuqaroligidan voz kechib, bu qaror Togʻli Qorabogʻ atrofidagi vaziyat bilan bogʻliq ekanligini aytgan.

Tadbirkor 2023-yil sentyabr oyida Ozarbayjonning mintaqadagi harbiy operatsiyasidan soʻng, natijada bahsli hudud Boku nazoratiga oʻtganidan keyin Armanistonga kirishga urinayotganda Ozarbayjon huquqni muhofaza qiluvchi organlari tomonidan ushlangan. Shundan beri u qamoqda boʻlgan.

Tergov maʼlumotlariga koʻra, Vardanyanga terrorizmni moliyalashtirish, noqonuniy qurolli tuzilmalar yaratish va Ozarbayjon davlat chegarasini noqonuniy kesib oʻtish kabi 40 dan ortiq ayblovlar qoʻyilgan.

Source: kun.uz