Suriya poytaxti Damashqda Mudofaa vazirligi binosi yaqinida sodir bo‘lgan avtomobil portlashi oqibatida kamida bir askar halok bo‘lib, 20 dan ortiq kishi yaralandi. Bu haqda rasmiy ma’lumotlarda aytiladi.

Davlat ommaviy axborot vositalari orqali tarqatilgan bayonotda, Mudofaa vazirligi armiya bo‘linmasi a’zolari poytaxtning Bab Sharqi tumanidagi hududda o‘rnatilgan qo‘lbola portlovchi qurilmani topgani, uni zararsizlantirishga harakat qilayotganda xuddi shu hududda avtomobil portlagani qayd etilgan. Qo‘shimcha tafsilotlar berilmagan.

Suriya tez tibbiy yordam va favqulodda vaziyatlar boshqarmasi rahbari Najib al-Naasonning so‘zlariga ko‘ra, halok bo‘lgan askardan tashqari kamida 21 kishi yaralanib, yaqin atrofdagi shifoxonalarga yotqizilgan.

Ijtimoiy tarmoqlardagi videolarda voqea joyidan tutun ko‘tarilayotgani va o‘t o‘chiruvchilarning olovni o‘chirishga shoshilayotgani aks etgan.

Hozircha hech kim portlash uchun javobgarlikni o‘z zimmasiga olmagan.

2024-yil oxirida uzoq yillik prezident Bashar al-Asadning 13 yildan ortiq davom etgan urushdan keyin qulashidan beri Suriyada harbiy va fuqarolik transport vositalarini nishonga olgan portlashlar kabi xavfsizlik hodisalari vaqti-vaqti bilan sodir bo‘lmoqda.

Hujum joyi yaqinidan xabar bergan Al Jazeera muxbiri Xeydi Pettning ta’kidlashicha, Suriyadagi xavfsizlik vaziyati “ancha murakkab”ligicha qolmoqda.

O‘tgan yili Suriya shimolidagi Manbij shahri chekkasida avtomobil portlashi kamida 20 kishining hayotiga zomin bo‘lgan, Damashqdagi gavjum cherkovda esa xudkush terrorchi hujumi natijasida kamida 25 kishi halok bo‘lib, o‘nlab kishilar yaralangan edi.

2024-yil iyun oyida poytaxtda avtomobildagi qurilma portlashi oqibatida bir kishi halok bo‘lgan.

Source: www.aljazeera.com