Kanadada yillik inflyatsiya darajasi may oyida 3,2 foizga ko'tarilib, 29 oylik eng yuqori ko'rsatkichga erishdi. Bu, asosan, AQSh rejimining Eron bilan keskinlashuvi tufayli neft narxlarining oshishi bilan bog'liq.

Statistika Kanada agentligining ma'lumotlariga ko'ra, bu ko'rsatkich ikki yarim yil ichida birinchi marta Kanada Markaziy bankining 1-3 foizlik maqsadli diapazonidan chiqib ketdi. Iqtisodchilarning fikricha, bu bir oylik holat bo'lsa ham, xavotirli signaldir.

BMO Capital Markets bosh iqtisodchisi Dug Porter Reuters agentligiga bergan izohida: "Umumiy inflyatsiya darajasi 3 foizdan yuqori bo'lishi hech qachon yaxshi yangilik emas, hatto bir oy bo'lsa ham", dedi.

May oyida oylik inflyatsiya 1 foizga oshib, 15 oylik eng yuqori ko'rsatkichni qayd etdi. Benzin narxlari yillik hisobda 33,2 foizga sakrab, Rossiyaning Ukrainaga bostirib kirishidan beri eng yuqori darajaga yetdi.

Transport xarajatlari oldingi oyga nisbatan 9 foizga oshdi. Oziq-ovqat narxlari 3,8 foizga ko'tarilib, yangi mevalar 5,3 foizga, sabzavotlar esa 9 foizga qimmatlashdi.

Uy-joy xarajatlari may oyida 1,7 foizga o'sdi, aprelda esa 1,8 foiz edi. Ipoteka krediti xarajatlari 0,2 foizga kamaydi.

Inflyatsiyaning o'sishi Bosh vazir Mark Karni uchun siyosiy muammo tug'dirmoqda, chunki u aprel oyida saylovda g'alaba qozonib, hayot darajasini yaxshilashga va'da bergan edi.

Biroq, iyun oyida neft narxlari keskin pasaydi, chunki AQSh rejimi va Eron o'rtasida Hormuz bo'g'ozini qayta ochish bo'yicha vaqtinchalik tinchlik kelishuvi imzolandi. Oksford Economics iqtisodchisi Maykl Davenportning ta'kidlashicha, bu may oyini inflyatsiya cho'qqisiga aylantirishi mumkin, ammo sulhning mustahkamligi noaniqligicha qolmoqda.

Source: www.aljazeera.com