Rossiya kuchlari tomonidan Ukrainaning turli hududlariga uyushtirilgan tungi hujumlar natijasida kamida 8 kishi halok bo‘lib, o‘nlab kishilar yaralandi. Eng katta talofat va vayronagarchiliklar sharqdagi Dnepropetrovsk viloyati va g‘arbdagi Lvov viloyatida qayd etildi.

Hujumlar Rossiyaning yoz davomida kuchaytirgan va deyarli haftalik tus olgan yirik hujumlarining bir qismidir. Ukraina prezidenti Vladimir Zelenskiy hujumlarni “Rossiya terrori” deb atab, “hayotni himoya qilishni qo‘llab-quvvatlash muhim”ligini ta’kidladi.

Zelenskiy o‘zining X’dagi postida “Rossiya raketa tahdididan himoya qilish xalqimiz hayotini saqlab qolishda eng muhim vazifadir” deb yozdi va bu ishni “faqat Ukrainaga yoki biron bir davlatga qoldirib bo‘lmaydi” dedi.

Ukraina prezidentining so‘zlariga ko‘ra, Rossiya 70 dan ortiq raketa, jumladan ballistik raketalar va 280 dan ortiq hujumchi dronlarni ishga tushirgan. Ukraina havo hujumidan mudofaa tizimlari 260 dan ortiq dronni urib tushirgan.

Zelenskiy ballistik raketalarga qarshi mudofaa vositalarini yetkazib berishdagi kechikishlar va o‘z vaqtida yordam ko‘rsatilmagani hujumdagi vayronagarchilik va qurbonlar ko‘lamiga sabab bo‘lganini aytdi. U Ukraina havo hujumidan mudofaasini qo‘llab-quvvatlash hayotni saqlab qolishda muhimligini qo‘shimcha qildi.

Rossiya Mudofaa vazirligi o‘z navbatida tungi vaqtda 258 ta Ukraina dronini urib tushirilganini ma’lum qildi. Penza gubernatori Oleg Melnichenko Wildberries onlayn-do‘konining ombori yong‘inga uchraganini, bir kishi yaralangan va 200 ga yaqin ishchi evakuatsiya qilinganini aytdi.

Source: www.aljazeera.com