Yevropa Komissiyasi rahbari Ursula fon der Leyen Grenlandiyaga tashrif buyurib, Daniya avtonom hududi bilan yaqinroq hamkorlik qilish niyatini bildirdi. Ushbu tashrif AQSh prezidenti Donald Trampning orolni qo'shib olish tahdidlariga javob sifatida baholanmoqda.

Fon der Leyen Nuukda Daniya Bosh vaziri Mette Frederiksen va Grenlandiya Bosh vaziri Jens-Frederik Nilsen bilan uchrashdi. Uchrashuvda Yevropa Ittifoqining Grenlandiya uchun 200 million yevro (232 million dollar) hajmidagi investitsiya paketi e'lon qilindi.

"Hududiy yaxlitlik, suverenitet, chegaralarning daxlsizligi xalqaro huquqning asosiy tamoyillaridir", dedi fon der Leyen matbuot anjumanida. Uning ta'kidlashicha, Grenlandiyaning kelajagini faqat Grenlandiya va Daniya xalqi hal qilishi kerak.

"Yevropa Ittifoqi-Grenlandiya hamkorlik paketi" uchta ustuvor yo'nalishni o'z ichiga oladi: aloqa, toza energiya va muhim xomashyo. Bu mablag'lar joriy va kelgusi yilga mo'ljallangan.

Grenlandiya Bosh vaziri Nilsen tashrifni "yaqin do'stlik va yaxshi hamkorlikni" chuqurlashtirish imkoniyati deb atadi. Eslatib o'tamiz, Grenlandiya 1985-yilda Yevropa Ittifoqidan chiqqan, ammo uning 57 ming aholisi Daniya fuqaroligi orqali YI fuqarolari hisoblanadi.

Arktika mintaqasi strategik ahamiyat kasb etayotgan bir paytda, Tramp Grenlandiyani AQSh "milliy xavfsizligi" uchun zarur deb hisoblamoqda. U orolda "Xitoy va Rossiya kemalari hamma joyda" degan da'volarni ilgari surgan, ammo hech qanday dalil keltirmagan.

Trampning Daniya orolni Xitoy va Rossiyadan himoya qila olmasligi haqidagi da'volari Yevropa bilan munosabatlarni keskinlashtirgan va NATO ichida taranglikni oshirgan. Grenlandiya va Daniya hukumatlari Trampning talablarini rad etgan.

Source: www.dw.com