Niderlandiyaning Rotterdam shahrida Butunjahon tibbiyot assotsiatsiyasining (WMA) yig‘ilishi o‘tayotgan bino yaqinida yuzlab shifokorlar norozilik namoyishiga yig‘ildi. Ishtirokchilar Isroil tibbiyot assotsiatsiyasini (IMA) mazkur nufuzli xalqaro tashkilot safidan zudlik bilan chetlatishni talab qilishdi.

Namoyish davomida 81 nafar tibbiyot xodimi o‘zlarining maxsus xalatlarini yechib, WMA assambleyasi qarshisiga qator qilib osib qo‘ydi. Har bir xalatga noqonuniy ravishda hibsda saqlanayotgan falastinlik tibbiyot xodimlarining ismlari yozilgan bo‘lib, bu tadbir Isroil rejimining harakatlariga qarshi qaratilgan norozilik kampaniyasining bir qismi bo‘ldi.

“IMA Out!” koalitsiyasi bayonotiga ko‘ra, Isroil tibbiyot uyushmasi WMA’ning tibbiy etika qoidalarini qo‘pol ravishda buzib kelayotganiga qaramay, tashkilotdagi a’zoligini saqlanib qolayotgani tanqid qilindi. Shifokorlarning fikricha, bu holat xalqaro tibbiy neytrallik tamoyillariga zid keladi va sheriklikni anglatadi.

Kampaniya faollarining ta’kidlashicha, mojaro boshlanganidan beri Falastinda minglab tibbiyot xodimlari halok bo‘lgan va deyarli barcha shifoxonalar vayron qilingan. Biroq Isroil tibbiyot assotsiatsiyasi bu holatlarga nisbatan mutlaqo sukut saqlab, xalqaro hamjamiyatning qoralashlariga to‘sqinlik qilib kelayotgani aytilmoqda.

Source: www.aljazeera.com