1-sentabrdan boshlab O‘zbekistonda madaniyat va san’at sohasidagi iqtidorli yoshlarni qo‘llab-quvvatlashning yangi tizimi ishga tushadi. Respublika tanlovlari g‘oliblari 100 million so‘m, xalqaro musobaqalar sovrindorlari esa 300 million so‘mgacha mukofot olishlari mumkin bo‘ladi.

Davlat ularning tanlov va festivallardagi ishtiroki uchun barcha xarajatlarni to‘liq qoplaydi. Prezident Shavkat Mirziyoyev madaniyat va san’at xodimlari bilan uchrashuvda ushbu chora-tadbirlarni e’lon qildi.

Iqtidorli yoshlarning ustozlari va o‘qituvchilari oylik maoshlariga 100 foizgacha qo‘shimcha haq olishlari mumkin. Imtiyozlar davlat muassasalari bilan bir qatorda xususiy ijodiy jamoalar va studiyalarga ham tatbiq etiladi.

Har yili 100 nafar yosh fuqaro davlat hisobidan xorijiy yetakchi madaniyat va san’at o‘quv yurtlariga o‘qishga yuboriladi. Iqtidorli yoshlarni izlash, rivojlantirish va targ‘ib qilish, shuningdek, prodyuserlar va ijodiy tashabbuslarni qo‘llab-quvvatlash uchun “Investitsiyalar ijodga” jamg‘armasi tashkil etiladi.

Jamg‘arma faoliyatiga har yili 200 milliard so‘m ajratiladi. Yangi chora-tadbirlar yoshlarning ijodiy salohiyatini rivojlantirish va o‘zbek madaniyat va san’at arboblarining xorijda raqobatbardoshligini oshirishga xizmat qilishi kutilmoqda.

Eslatib o‘tamiz, bugun, 1-iyun kuni poytaxtdagi Xalqaro kongress markazida prezident Shavkat Mirziyoyev madaniyat, san’at va adabiyot sohasi xodimlariga orden, medallar va faxriy unvonlar topshirdi.

Source: podrobno.uz