11-iyun kuni O‘zbekiston Respublikasining “Sud-ekspertlik faoliyati to‘g‘risida”gi qonuni [O‘RQ-1152-son] qabul qilindi. Ushbu qonunning asosiy maqsadi sud-ekspertlik faoliyati sohasidagi munosabatlarni tartibga solishdan iborat.

Qonunga ko‘ra, davlat va nodavlat sud eksperti lavozimini faqat oliy ma’lumotga ega, muayyan sud-ekspert ixtisosligi bo‘yicha tayyorgarlikdan o‘tgan va sud ekspertizasini o‘tkazish huquqini beruvchi guvohnomaga (sertifikatga) ega bo‘lgan O‘zbekiston fuqarosi egallashi mumkin. Bu talab ekspertlarning professional darajasini oshirishga xizmat qiladi.

Sud ekspertlarining davlat reyestri Adliya vazirligi tomonidan yuritiladi. Ushbu reyestr ekspertlarning malakasi va ishonchliligini nazorat qilish imkonini beradi.

Sud-ekspertlik faoliyatining tashkiliy shakllari sifatida O‘zbekiston sud ekspertlari palatasi (Palata) belgilangan. Palata sud ekspertlarining a’zoligiga asoslangan nodavlat notijorat tashkilotdir.

Qonunga ko‘ra, sud ekspertizasini tayinlagan organ (shaxs) tadqiqotlarni o‘tkazish va xulosa berish uchun sud ekspertiga zarur tadqiqot obyektlarini hamda ish materiallarini taqdim etadi. Shuningdek, u tadqiqot uchun namunalar oladi va ularni protsessual qonunchilikda belgilangan tartibda ishga qo‘shib qo‘yadi.

Sud ekspertizasini o‘tkazish muddatlari 30 kalendar kunni tashkil etadi. Agar ekspertizani 30 kun ichida o‘tkazish imkoni bo‘lmasa, ekspertiza tayinlagan organga (shaxsga) muddat tugashiga 3 ish kuni qolguniga qadar xabar qilinadi va mazkur organ (shaxs) bilan kelishilgan muddatgacha uzaytirilishi mumkin.

Sud eksperti yoki sud ekspertlari komissiyasi tadqiqotlarni o‘tkazib bo‘lgandan keyin tegishincha sud eksperti yoxud sud ekspertlari komissiyasi tarkibiga kiruvchi har bir sud eksperti imzosi bilan tasdiqlanadigan xulosa tuzadi. Bu xulosa sud jarayonida muhim dalil sifatida qabul qilinadi.

Source: www.gazeta.uz