Prezident Namangan viloyatiga safari chog‘ida “Navbahor” futbol akademiyasiga bordi va u yerda yosh sportchilar uchun yaratilgan sharoitlar hamda o‘quv-mashg‘ulot jarayoni tashkil etilishi bilan tanishdi.

Eslatib o‘tamiz, “Navbahor” akademiyasi boshqaruvi uch yil muddatga dunyoning eng yaxshi futbol klublaridan biri sifatida tan olingan Gollandiyaning “Ayaks” klubiga topshirilgan edi.

Tomonlar o‘rtasidagi hamkorlik doirasida qo‘shma yoshlar futbol akademiyasini tashkil etish loyihasi amalga oshirilmoqda. Bu yerda “Ayaks” mutaxassislari tomonidan ishlab chiqilgan o‘yinchilar va murabbiylarni tayyorlashning zamonaviy usullari joriy etilmoqda. Hozirda akademiyada xorijlik murabbiylar va skautlar ishlaydi, ular yosh futbolchilarni Yevropa standartlari asosida o‘qitadi.

Tashrif chog‘ida prezident akademiya infratuzilmasi, mashg‘ulot maydonlari va tarbiyalanuvchilar uchun yaratilgan sharoitlar bilan tanishdi. Yosh sportchilar bilan muloqotda ularning muvaffaqiyatlari, sport maqsadlari va kelajak rejalari bilan qiziqdi.

Shuningdek, mahalliy futbolni yanada rivojlantirish, sport zaxirasini tayyorlash tizimini takomillashtirish, iqtidorli yoshlarni qo‘llab-quvvatlash va milliy terma jamoaning xalqaro maydondagi raqobatbardoshligini oshirish masalalari muhokama qilindi.

Source: uznews.uz