30-sentabr kuni O‘zbekiston Prezidenti Shavkat Mirziyoyev Xalqaro futbol assotsiatsiyalari federatsiyasi (FIFA) prezidenti Janni Infantinoni qabul qildi. Uchrashuv davlat rahbari matbuot xizmati tomonidan yoritildi. Suhbat avvalida FIFA rahbari O‘zbekistonning futbol sohasidagi yutuqlarini va mamlakatda sportni har tomonlama qo‘llab-quvvatlashga qaratilgan samarali islohotlar natijalarini alohida ta’kidladi.

Uchrashuvning asosiy mavzusi O‘zbekiston va Ozarbayjon tomonidan birgalikda o‘tkazilishi rejalashtirilayotgan yirik va nufuzli sport tadbiri – 20 yoshgacha bo‘lgan yoshlar o‘rtasidagi Jahon chempionatiga tayyorgarlik masalalari bo‘ldi. Tomonlar futbolni, ayniqsa yoshlar orasida ommalashtirish bo‘yicha qo‘shma dasturlarni ilgari surishda FIFA bilan samarali hamkorlikni qayd etdilar.

Shuningdek, uchrashuvda hamkorlikni yanada kengaytirish, xususan, futbolni tashkil etish va boshqarish tizimini transformatsiya qilish, yosh iqtidorlarni kashf etishga ko‘maklashish, xalqaro darajada murabbiylar, hakamlar, menejerlar, sport shifokorlari va texnik mutaxassislarni tayyorlash masalalari ko‘rib chiqildi.

Alohida e’tibor O‘zbekistonda FIFAning yirik turnirlari va tadbirlarini tashkil etishga, shuningdek, federatsiyaning Toshkent shahridagi mintaqaviy ofisini ochishni tezlashtirishga qaratildi. Ma’lumot uchun, O‘zbekiston so‘nggi yillarda futbol infratuzilmasini rivojlantirish va xalqaro musobaqalarga mezbonlik qilishga faol kirishib, sport diplomatiyasi orqali xalqaro maydondagi mavqeini mustahkamlamoqda.

Source: www.uznews.uz