Davlat rahbari chorshanba kuni bo‘lib o‘tgan tadbirda mamlakat ta’lim tizimida tub burilish yasovchi yangi tashabbuslarni e’lon qildi. Unga ko‘ra, keyingi o‘quv yilidan boshlab 100 ta maktabning har birida bittadan sinfda matematika, informatika va tabiiy fanlar to‘liq ingliz tilida olib boriladi. Bu qadam o‘quvchilarning xalqaro miqyosda raqobatbardoshligini oshirishga qaratilgan.

Loyihaga jalb etilgan o‘qituvchilar hamda maktabgacha tayyorlov guruhlari pedagoglariga 100 foizlik ish haqi ustamasi belgilanadi. Bu imtiyoz malakali kadrlarni rag‘batlantirish va ularning mehnatini munosib baholash maqsadida kiritilmoqda.

Shuningdek, o‘rta ta’limda «sifat indeksi» joriy etiladi. Maktablar pedagogik jamoa salohiyati, o‘quvchilarning ta’lim va tarbiyadagi natijalariga qarab toifalarga bo‘linadi. Agar ilg‘or maktab boshqa maktablarga tajriba ulashib, ularni yuqori toifaga o‘tishiga yordam bersa, uning pedagogik jamoasi 30 foiz ustama oladi.

Pedagoglar uchun poytaxt yoki viloyat markaziga majburiy borib, bir oylik kurslarda o‘qish talabi bekor qilinadi. Buning o‘rniga kasbiy rivojlanish vaucherlari joriy etiladi. Malaka sinovi natijasiga qarab o‘qituvchi 18 soatdan 72 soatgacha davom etadigan o‘quv kursini tanlashi mumkin. Kurs va malaka oshirish joyini o‘zi mustaqil tanlaydi.

Davlat rahbari ushbu o‘zgarishlar malaka oshirishni rasmiyatchilikdan amaliy zaruratga aylantirishi kerakligini alohida ta’kidladi. Bu islohotlar o‘qituvchilarning kasbiy o‘sishiga real turtki berish va ta’lim sifatini xalqaro standartlarga yaqinlashtirishga xizmat qiladi.

Source: www.uznews.uz