Buxoro viloyati G'ijduvon tumanida og'ir bemorlar uchun mo'ljallangan narkotik preparatlarni o'g'irlash holati aniqlandi. Bunga tuman tibbiyot birlashmasi anesteziologiya va reanimatsiya bo'limining feldsheri va hamshiralari aloqador bo'lgan.

Tergov ma'lumotlariga ko'ra, katta feldsher 2023-2025 yillarda o'z lavozimidan noqonuniy foydalanib, bo'lim hamshiralari bilan jinoyatchilik kelishuviga kirishgan. Natijada narkotik moddalarni o'z ichiga olgan Morfin gidroxlorid 1%, Promedol 2%, Fentanil 0,005% va Omnopon preparatlari noqonuniy ravishda o'zlashtirilgan.

Jami 7 894 dona narkotik dorilar 48,6 million so'm qiymatida o'g'irlangan. Bundan tashqari, morfin, trimeperidin, fentanil va boshqa narkotik vositalarning katta partiyalari ham noqonuniy o'zlashtirilgan.

Ayblanuvchiga nisbatan 167-, 228- va 271-modda bo'yicha jinoyat ishi qo'zg'atilgan va u qamoqqa olingan. Ekspertiza uning narkotik qaramlikdan aziyat chekayotganini va majburiy davolanishga muhtoj ekanligini aniqlagan.

Hamshiralarga tegishli materiallar alohida ishga ajratilgan. Tergov harakatlari yakunlangan va jinoyat ishi sudga yuborilgan.

Source: podrobno.uz