Belgiyaning poytaxt Bryusseldan 23 km uzoqlikdagi Buggenhout shahri yaqinida poyezd maktab avtobusiga urilib, kamida to‘rt kishi, jumladan ikki o‘smir halok bo‘ldi. Voqea seshanba kuni ertalab sodir bo‘lgan.

Transport vaziri Jan-Lyuk Kryukning ma’lum qilishicha, qurbonlar orasida avtobus haydovchisi va bolalarni kuzatib borayotgan katta yoshli shaxs ham bor. Yana ikki kishi og‘ir yaralangan.

Xavfsizlik kameralari temir yo‘l kesishmasidagi to‘siqlar tushirilganligini ko‘rsatgan, bu Infrabel operatori tomonidan tasdiqlangan. Politsiya vakili Frederik Sakr to‘qnashuvni “juda shiddatli” deb ta’riflab, halokatni “dahshatli” deb atadi.

Voqea mahalliy vaqt bilan soat 8:08 da sodir bo‘lgan. Poyezd keyingi bekatda to‘xtashi kerak edi, u bir kilometr uzoqlikda joylashgan.

Belgiya ichki ishlar vaziri Bernar Kenten va Yevropa Komissiyasi rahbari Ursula fon der Lyayen hamdardlik bildirgan. Belgiyada temir yo‘l kesishmalarida avval ham bir necha bor baxtsiz hodisalar ro‘y bergan. O‘tgan yili bunday hodisalarda besh kishi halok bo‘lgan.

Source: www.dw.com