AQSh prezidenti Donald Tramp ma'muriyati 24 iyuldan boshlab 80 dan ortiq davlatdan keltiriladigan tovarlarga 10-12,5% miqdorida yangi import bojlarini joriy etdi. Ushbu chora AQSh importining 99,4 foizini qamrab oladi va vaqtinchalik 10 foizlik tarif o'rnini egalladi.

Ma'muriyat ma'lumotlariga ko'ra, qaror xorijiy davlatlarning majburiy mehnat yordamida ishlab chiqarilgan tovarlar eksportiga qarshi kurashdagi sa'y-harakatlari yetarli emasligi sababli qabul qilingan.

Bazaviy 10% stavka talablarga rioya qilgan davlatlarga nisbatan qo'llaniladi. Bular Yevropa Ittifoqi, Buyuk Britaniya, Kanada, Meksika va Hindiston. Qolgan 38 davlat, jumladan Xitoy, Yaponiya, Avstraliya va Braziliya uchun 12,5% tarif belgilangan.

Yangi bojlar neft, gaz, o'g'itlar, oziq-ovqat mahsulotlari, muhim minerallar, aviatsiya texnikasi va USMCA bitimi doirasidagi tovarlarga tatbiq etilmaydi. Shuningdek, metall va avtomobil sanoati bojlari bilan qoplangan tovarlar ham istisno qilingan.

Vashington qarori bir qator davlatlarning salbiy munosabatiga sabab bo'ldi. Braziliya, Yaponiya, Norvegiya va Avstraliya hukumatlari yangi tariflarni asossiz deb atadi. Braziliya javob choralariga tayyorligini bildirgan bo'lsa, Xitoy Tashqi ishlar vazirligi ishchilar huquqlari buzilishi haqidagi ayblovlarni rad etdi.

Soha yuristlarining fikricha, yangi bojlar sud jarayonlariga sabab bo'lishi mumkin, chunki ma'muriyatni vakolatlarini oshirib yuborishda ayblash mumkin.

Nyu-York Federal rezerv banki hisob-kitoblariga ko'ra, bunday tariflar bilan bog'liq xarajatlarning 90% gacha qismi oxir-oqibat amerikalik iste'molchilar va biznes zimmasiga tushadi. AQSh Savdo vakili idorasi 16 davlatga nisbatan ortiqcha ishlab chiqarish quvvatlari bo'yicha tekshiruvni davom ettirmoqda.

Eslatib o'tamiz, 19 avgustdan AQSh Kanadadan keltiriladigan alkogol, yog'och, qog'oz va xokkey jihozlariga qo'shimcha 50% boj joriy etadi. Bu qaror Kanada provinsiyalarining amerikalik alkogolga nisbatan cheklovlariga javoban qabul qilingan.

Source: podrobno.uz