Sudanning G‘arbiy Darfur viloyatidagi Garra al-Zavaya qishlog‘ida joylashgan an’anaviy sud binosiga havo hujumi uyushtirildi. Huquq himoyachilari guruhi “Favqulodda yuristlar” ma’lumotiga ko‘ra, yakshanba kuni mahalliy vaqt bilan soat 13:00 atrofida sodir bo‘lgan ushbu hujumda kamida 35 kishi halok bo‘ldi, yana bir qancha fuqarolar yaralandi.
Tashkilotning ta’kidlashicha, hujum vaqtida tinch aholi mahalliy nizolar va kelishmovchiliklarni hal qilish uchun sud majlisiga yig‘ilgan edi. Qishloq hozirda tezkor qo‘llab-quvvatlash kuchlari (RSF) nazorati ostida. Sud binosi, mahalliy va qabila nizolarini hal qilishda muhim rol o‘ynaydigan an’anaviy muassasa, hujum natijasida jiddiy shikastlangan.
Voqea guvohlaridan biri AFP agentligiga bergan intervyusida, “Sud majlisi daraxt tagida, mahalla oqsoqollari ishtirokida o‘tkazilayotgan edi”, dedi. Uning so‘zlariga ko‘ra, halok bo‘lganlar orasida to‘rt nafar qabila rahbari va ikki nafar RSF qo‘mondoni ham bor.
Garra al-Zavaya qishlog‘i Kabkabiya shahri yaqinida, Darfurdagi armiyaning so‘nggi tayanchi bo‘lgan al-Fashirdan 150 km g‘arbda joylashgan. O‘tgan yilning oktyabr oyida RSF kuchlari shaharni qonli hujumdan so‘ng egallab olgan edi. Birlashgan Millatlar Tashkiloti tergovchilari al-Fashir qamali va egallanishi bilan bog‘liq zo‘ravonlik “genotsid alomatlari”ga ega ekanini ta’kidlagan.
Shahar qo‘lga kiritilgach, RSF mintaqaning katta qismini nazorat qilishni kuchaytirdi. Bu guruh 2000-yillarning boshlarida Darfurdagi vahshiyliklarda ayblangan hukumat tomonidan qo‘llab-quvvatlangan jangaavidlar militsiyasidan kelib chiqqan. O‘shandan beri har ikki tomon ham dron urushlariga tobora ko‘proq tayanmoqda. BMT ma’lumotlariga ko‘ra, joriy yilning birinchi besh oyida dron hujumlarida 1000 dan ortiq tinch aholi halok bo‘lgan.
Mojaro millionlab odamlarni o‘z uylarini tark etishga majbur qildi va BMT ta’rifiga ko‘ra, dunyodagi eng yirik gumanitar inqirozni keltirib chiqardi. Sudan fuqarolar urushi 2023-yil aprel oyida RSF qo‘mondoni Muhammad Hamdan Dagalo va uning sobiq ittifoqchisi, armiya rahbari Abdel Fattah al-Burhan o‘rtasidagi hokimiyat kurashi natijasida boshlangan bo‘lib, unda o‘n minglab odamlar halok bo‘lgan.
Source: www.aljazeera.com