Vengriya poytaxti Budapeshtda jadal qurg'oqchilik tufayli Dunay daryosi suvi rekord darajada pasayib, ikkinchi jahon urushi davridagi ikki nemis askarining jasadi topildi.

Nemis urush qabrlari komissiyasining ma'lum qilishicha, askarlar qoldiqlari yonida ularning shaxsiy identifikatsiya nishonlari, deyarli butun saqlanib qolgan nemis armiyasining Wehrmacht mototsikli, nikoh uzugi va Kuban qalqoni - Wehrmachtning jangovar nishoni topilgan.

Komissiya vakili Arne Shraderning Bild gazetasiga aytishicha, endi ular ikki o'lgan askarning kimligini aniqlash uchun boshqotirmani yechishni boshlaydilar. Bu topilma urushdan 80 yil o'tib, ba'zi oilalar o'z ajdodlarining taqdirini nihoyat bilib olishlariga umid uyg'otmoqda.

Mototsikl 1944-yilda harbiy maqsadlarda ishlab chiqarilgan DKW NZ 350-1 modeli deb taxmin qilinmoqda. Topilgan ikkita nishondan biri Wehrmacht askariga, ikkinchisi esa Nyurnberg sudlarida harbiy jinoyatlar uchun javobgar deb topilgan Waffen-SS a'zosiga tegishli.

Komissiya, bu ikki askarning oilalari o'lim haqida rasmiy xabarni "behuda kutgan" bo'lishlari mumkinligini aytdi. Ular askarlarning shaxsini aniqlash bo'yicha tergov boshlagan va qarindoshlari yo'qolganlar o'z ma'lumotlarini ularning ma'lumotlar bazasida qidirishlari mumkin.

Ammo shaxsni aniqlash vaqt talab etadi, chunki identifikatsiya nishonlari va Kuban qalqoni haqiqatan ham topilgan askarlarga tegishli ekanligini tekshirish kerak. Suyak tahlili askarlarning shaxsini aniqlashning asosiy usuli bo'ladi.

Askarlar Vengriya poytaxti yaqinidagi Budaörs shahridagi nemis harbiy qabristoniga dafn etiladi. Budapesht ikkinchi jahon urushi oxirida Sovet Qizil Armiyasi va nemis Wehrmacht o'rtasidagi shiddatli janglar maydoni bo'lgan.

So'nggi paytlarda Dunay daryosida urush qoldiqlari paydo bo'ldi, jumladan Serbiyaning Praxovo shahri yaqinida singan kema korpusi topildi. Bu kashfiyot ikkinchi jahon urushi bilan bog'liq ijtimoiy tarmoq guruhlarida katta qiziqish uyg'otdi.

Source: www.bbc.co.uk