Zambiya bilan chegaradosh Zimbabvedagi Kariba ko‘lida seshanba kuni parom cho‘kishi oqibatida kamida 44 kishi halok bo‘ldi. Bu haqda politsiya xabar berdi.

Paromning sig‘imi 90 yo‘lovchi va 5 ekipaj a’zosiga mo‘ljallangan edi, biroq ko‘l rasmiylariga ko‘ra, bortda 12 bola bilan birga 120 kishi bo‘lgan. Kema kuchli to‘lqin ta’sirida ag‘darilgan.

Ijtimoiy tarmoqlarda tarqalgan videolarda paromning ag‘darilgan korpusi suvda suzayotgani ko‘rinadi. Prezident Emmerson Mnangagva falokat holatini e’lon qildi va qutqaruv ishlari kuchaytirildi. Hozirgacha 77 kishi qutqarildi.

Kariba ko‘li dunyodagi eng yirik sun’iy suv omborlaridan biri bo‘lib, transport va baliqchilikni ta’minlaydi hamda ikkala davlat uchun muhim gidroelektr energiya manbai hisoblanadi.

Mahalliy deputat Mutsa Murombedzi X’da paromning yo‘lga chiqishini aks ettiruvchi videoni joylab, aholi ko‘l orqali Kariba shahriga sayohat qilganini aytdi. U rasmiylardan bortdagi odamlar soni bo‘yicha aniq ma’lumot berishni talab qildi.

Zimbabve Fuqarolik Himoyasi Birligi (CPU) ro‘yxatga olingan chiptalarga ko‘ra, bortda 114 katta yoshli yo‘lovchi bo‘lganini, chipta yoshiga yetmagan bolalar soni noma’lumligini ma’lum qildi.

Politsiya so‘nggi ma’lumotida ko‘ldan 44 jasad topilganini, bu dastlabki 15 tadan ko‘p ekanini tasdiqladi. Mahalliy hukumat vaziri Daniel Garve prezident falokat holatini e’lon qilib, barcha zarur resurslarni safarbar qilishni buyurganini aytdi.

Qutqaruv ishlariga armiya qayiq eskadroni, politsiya suv osti guruhi va xususiy vertolyot jalb qilingan. Hukumat jabrlanganlar oilalariga hamdardlik bildirdi.

Source: www.bbc.co.uk