Zimbabwe politsiyasi Kariba ko‘lida ag‘darilgan paromdan yana to‘rtta jasad topilganini ma’lum qildi. Bu bilan halok bo‘lganlar soni kamida 84 nafarga yetdi. Qidiruv ishlari hali ham davom etmoqda.

Milliy politsiya xizmati yakshanba kuni X ijtimoiy tarmog‘idagi sahifasida to‘rtta jasad topilganini va qidiruv harakatlari davom etayotganini tasdiqladi. Bu voqea Zimbabve tarixidagi eng dahshatli parom halokati sifatida baholanmoqda.

Haddan tashqari yuklangan yo‘lovchi paromi seshanba kuni ag‘darilgan edi. Kemada 153 kishi bo‘lgani taxmin qilinmoqda. Rasmiylar paromning sig‘imi 90 kishiga mo‘ljallanganini, biroq bortda qancha odam bo‘lganini hali tasdiqlashmagan.

Qayiq Zambiya chegarasi yaqinida kuchli shamol tufayli ag‘darilgan. U mamlakat shimolidagi Kariba shahridan shimoli-g‘arbdagi qishloq va baliqchi jamoalariga qarab ketayotgan edi.

Shimoliy Zimbabveda infratuzilma yetishmasligi, jamoat transporti cheklanganligi va yo‘llarning yomon ahvoli tufayli suv orqali sayohat qilish keng tarqalgan. Mahalliy ommaviy axborot vositalari tomonidan shanba kuni e’lon qilingan videolarda yuzlab odamlar yaqinlarini tanib olish uchun mahalliy kasalxona oldida kutib turgani aks etgan.

Halokatda kamida 18 nafar bola hayotdan ko‘z yumdi. Prezident Emmerson Mnangagva seshanba kuni voqeaga munosabat bildirib, uni “fojiali” deb atadi va bu holat zudlik bilan hal qilinishi kerak bo‘lgan jiddiy kamchiliklarni ochib berganini ta’kidladi.

Source: www.aljazeera.com