Buyuk Britaniyaning Centre for Strategic Advantage (CSA) tahliliy markazi mutaxassislari Rossiya yaqin 15 yil ichida jahon uran qazib olishning uchdan bir qismini to'g'ridan-to'g'ri yoki bilvosita nazoratga olishi mumkin degan xulosaga kelishdi.

Tadqiqotchilarning ma'lumotlariga ko'ra, faqat Rossiya hududida qazib olingan uranni hisobga oladigan bo'lsak, 2024-yilda uning jahon bozoridagi ulushi taxminan 5 foizni tashkil etgan. Biroq, "Rosatom" tarkibiga kiruvchi va Qozog'iston, Tanzaniya, Namibiya hamda Nigerda xomashyo qazib oluvchi Uranium One kompaniyasining xalqaro loyihalarini hisobga olganda, 2024-yilda Rossiya nazorati ostida jahon quvvatlarining qariyb 25 foizi bo'lgan. Tahlilchilarning prognozlariga ko'ra, 2040-yilga kelib bu ko'rsatkich 36 foizgacha oshishi mumkin.

Financial Times ekspertlari so'nggi yillarda jahon narxlari pastligi va talabning kamligi sababli G'arb davlatlari uran konlarini o'zlashtirishga investitsiyalarni qisqartirganini ta'kidlamoqda. Shu bilan birga, yaqin istiqbolda uranga talabning o'sishi kutilmoqda.

Sanoat vakillari qazib olishni kengaytirish uchun uzoq muddatli davlat kafolatlari zarurligini bildirmoqda. Qo'shma Shtatlar 2024-yil may oyida Rossiyadan uran importiga 2028-yilgacha mumkin bo'lgan istisnolar bilan taqiq joriy qilgan, biroq cheklovlar "Rosatom"ning Rossiyadan tashqarida qazib oladigan uraniga taalluqli emas.

Yevropa Ittifoqida Rossiya uranini import qilish taqiqlanmagan.

2024-yil 26-martda "Navoiyuran" DP va "Texsnabeksport" "Uranium One Group" AJ bilan hamkorlik shartnomasini imzolagan edi.

Eslatib o'tamiz, 2026-yil mart oyi oxirida Jizzax viloyatida bo'lajak AES qurilishi maydonchasida birinchi beton ishlari boshlangan edi – quruvchilar kichik quvvatli RITM-200N reaktori binosi poydevorini quyishni boshlashdi. O'zbekistondagi atom elektr stansiyasi loyihasi mamlakatning uzoq muddatli iqtisodiy va texnologik rivojlanishining asosiy elementi sifatida ko'rilmoqda.

Source: podrobno.uz