O‘zgidromet 9-12 iyun kunlari kutilayotgan yomg‘irlar sababli O‘zbekistonning tog‘oldi va tog‘li hududlarida sel-suv toshqin hodisalari yuzaga kelishi mumkinligi haqida ogohlantirish e’lon qildi.

Mutaxassislarning ma’lumotlariga ko‘ra, ayniqsa, tog‘li hududlarda kuchli yog‘ingarchiliklar natijasida daryolar sathi ko‘tarilib, sel oqimlari shakllanishi mumkin. Bu esa mahalliy aholi va dam oluvchilar uchun jiddiy xavf tug‘diradi.

O‘zgidromet xizmati tog‘oldi va tog‘li hududlarda istiqomat qiluvchi fuqarolar, sayyohlar hamda tog‘ yo‘llarida harakatlanuvchi haydovchilarni ehtiyotkorlik choralarini kuchaytirishga chaqirdi.

Shuningdek, ayrim hududlarda yomg‘ir suvlarining to‘planishi natijasida mahalliy aholi punktlarini suv bosishi ehtimoli bor. Favqulodda vaziyatlar vazirligi bilan hamkorlikda xavfsizlik choralari ko‘rilmoqda.

Aholiga ogohlantirishlarga rioya qilish, keraksiz sayohatlardan voz kechish va xavfli hududlardan uzoqroq turish tavsiya etiladi.

Source: www.gazeta.uz