Surxondaryo viloyatini kompleks rivojlantirish bo‘yicha Shavkat Mirziyoyev raisligidagi yig‘ilishda 2026-yilga mo‘ljallangan investitsiyalar, eksport, sanoatni kengaytirish, shuningdek, qashshoqlik va ishsizlikni kamaytirishga qaratilgan ustuvor vazifalar belgilandi.
Yig‘ilishda viloyat hokimi va tuman hokimlariga joriy yilda investitsiyalar hajmini 3 milliard dollargacha, eksportni esa 1 milliard dollargacha yetkazish vazifasi qo‘yilganligi ta’kidlandi. Shuningdek, mintaqada qashshoqlik darajasini 2,8 foizgacha, ishsizlikni esa 4,5 foizgacha pasaytirish muhimligi urg‘ulandi.
Davlat rahbari Termiz shahri, Angor, Denov, Jarqo‘rg‘on, Qiziriq va Muzrabot tumanlarini “qashshoqlik va ishsizlikdan xoli hududlar”ga aylantirish zarurligini alohida ta’kidladi.
Oxirgi to‘qqiz yil ichida viloyat iqtisodiyotidagi sanoat ulushi 5 baravar o‘sib, 10 foizga yetganligi xabar qilindi. Biroq, bu ko‘rsatkich hali ham past ekanligi ta’kidlandi.
Yig‘ilishda mintaqada 100 million tonna ko‘mir zahirasi bo‘lishiga qaramay, har yili atigi 1 foizi qazib olinayotganligi aytildi. Shu munosabat bilan joriy yilda Boysunda “Sanjar”, Oltinsoy tumanida “Oqsuv” konlarida, keyingi yilda esa “Fangart” konida ko‘mir qazib olishni boshlash buyurildi.
Shuningdek, Janubiy Afrika kompaniyasi “Sosol” ko‘mirdan polipropilen, polietilen va kauchuk ishlab chiqarish loyihalariga qiziqish bildirganligi xabar qilindi. Xitoy investorlari Sariosiyo tumanidagi “Qoraqon”, “Jemsonit”, “Chuqur”, “Bayram-1” konlariga 1 milliard dollar sarmoya kiritishga tayyor ekanligi ta’kidlandi.
Umuman olganda, bu zahiralar elektrotexnika, qurilish, kimyo, metallurgiya va avtomobilsozlik sohalari uchun tayyor xom ashyo bazasi ekanligini ta’kidlab, konlar atrofida sanoat korxonalarini joylashtirish bo‘yicha hisob-kitoblar o‘tkazish va kamida 200 million dollarlik loyihalar tuzish buyurildi.
Bundan tashqari, Boysunda joylashgan “Bezaktop” konidagi tabiiy tosh zahiralarining etarli darajada o‘rganilmaganligi, uning sifati Eron, Turkiya va Italiya mahsulotlari bilan raqobatlasha olishi ta’kidlandi. Shunga o‘xshash konlarda geologik-qidiruv ishlarini boshlash buyurildi.
Source: kun.uz