O‘zbekistonda yanvar−iyul oylarida tabiiy gaz, neft va gaz kondensatini qazib olish hajmining pasayishi kuzatildi. Milliy statistika qo‘mitasi ma’lumotlariga ko‘ra, tabiiy gaz qazib olish 21,6 mlrd kubometrni tashkil etib, o‘tgan yilning shu davriga nisbatan 15 foizga kam bo‘ldi.

Iyul oyida gaz ishlab chiqarish sezilarli tiklandi: 3,3 mlrd kubometr gaz qazib olindi, bu iyun oyidagi 2,5 mlrd kubometrdan 32 foizga ko‘p. Biroq, o‘tgan yilning iyul oyiga nisbatan pasayish hali ham 7,9 foizni tashkil qilmoqda.

Elektr energiyasi ishlab chiqarish esa o‘sishda davom etmoqda. Yanvar−iyul oylarida 52,5 mlrd kVt/soat elektr energiyasi ishlab chiqarildi, bu o‘tgan yilga nisbatan 6,4 foizga ko‘p. Iyul oyida esa ishlab chiqarish 8,36 mlrd kVt/soatni tashkil etib, yillik o‘sish 10 foizga yetdi.

Umumiy o‘sish asosan kichik korxonalar hisobiga ta’minlanmoqda. Ular, jumladan, yangi quyosh va shamol elektr stansiyalari, yetti oyda 17,25 mlrd kVt/soat elektr energiyasi ishlab chiqardi, bu o‘tgan yilga nisbatan 35,1 foizga ko‘p.

Avtomobil benzini ishlab chiqarish yanvar−iyul oylarida 731,9 ming tonnani tashkil etib, o‘sish 8,9 foizni tashkil qildi. Iyul oyida esa 117,7 ming tonna benzin ishlab chiqarildi, bu iyun oyiga nisbatan 5,1 foizga ko‘p.

Dizel yoqilg‘isi ishlab chiqarish yetti oyda 683,4 ming tonnani tashkil etdi, bu o‘tgan yilgi darajadan atigi 1,4 foizga ko‘p. Iyul oyida esa 115,4 ming tonna ishlab chiqarilib, iyun oyiga nisbatan 1,6 foizga kamaydi.

Ko‘mir qazib olish yanvar−iyul oylarida 3,5 mln tonnani tashkil etib, o‘tgan yilga nisbatan 9,5 foizga kam bo‘ldi. Biroq iyul oyida qazib olish hajmi 1 mln tonnaga yetib, iyun oyiga nisbatan sezilarli o‘sdi.

Neft qazib olish yetti oyda 368,7 ming tonnani tashkil etib, 2,7 foizga kamaydi. Iyul oyida esa 54,9 ming tonna neft qazib olindi, bu iyun oyiga nisbatan 5,8 foizga ko‘p.

Gaz kondensati ishlab chiqarishda esa sezilarli o‘zgarish kuzatildi: iyul oyida 105,4 ming tonna ishlab chiqarilib, iyun oyiga nisbatan 50 foizga va yillik hisobda 13,1 foizga oshdi. Bu yil boshidan beri birinchi marta o‘tgan yilgi ko‘rsatkichdan oshgan oy bo‘ldi.

Issiqlik energiyasi ishlab chiqarish esa yirik korxonalarda yanvar−iyul oylarida 18,3 foizga kamayib, 10,12 mln Gkalni tashkil etdi.

Source: www.gazeta.uz