Toshkent viloyatining Ohangaron tumanida qurilish kompaniyasi rahbari 83,5 ming AQSh dollari miqdorida pora olayotganda qo‘lga olindi. Bu haqda Davlat xavfsizlik xizmati (DXH) va Iqtisodiy jinoyatlarga qarshi kurashish departamenti xabar berdi.

Qayd etilishicha, qo‘lga olish jinoyat ustida amalga oshirilgan. Bosh pudratchi firma rahbari subpudratchidan bajarilgan ishlar uchun qarzni to‘lash va obyektdagi hamkorlikni davom ettirish evaziga mazkur summani talab qilgan.

Mojaro parrandachilik fabrikasi qurilishi jarayonida yuzaga kelgan. Joriy yilning aprel oyida bosh pudratchi obyekt hududidagi ichki yo‘llarni asfaltlash uchun tashqi firmani jalb qilib, 3,7 milliard so‘mga shartnoma tuzgan. Subpudratchi ish hajmini to‘liq bajargan, biroq faqat 2,5 milliard so‘m olgan. Qolgan 1,2 milliard so‘mni to‘lashni bosh pudratchi rahbari ataylab kechiktirib, hamkor kompaniya ta’sischisini katta miqdorda naqd pul to‘lashga majbur qilgan.

Hibsga olingan shaxsga nisbatan jinoyat ishi qo‘zg‘atilgan, tergov harakatlari davom etmoqda.

DXH ta’kidlashicha, tovlamachilik va korrupsiya holatlari haqida 1520 qisqa raqami orqali xabar berish mumkin. Maxfiylik kafolatlanadi.

Avvalroq Urgut tumani prokurorining o‘rinbosari pora olish va tovlamachilikda gumonlanib qo‘lga olingan edi.

Source: podrobno.uz