Poytaxtdagi Tashkent City Mall savdo majmuasida joylashgan Andakulova Gallery ko‘rgazma maydonida mashhur rassom Timur D’Vatsning «Sayohat» nomli shaxsiy ko‘rgazmasi o‘z ishini boshladi. Uzoq yillar davomida London va Normandiya o‘rtasida ijod qilib kelayotgan rassom naq 17 yil deganda ilk bor bolalik shahri Toshkentga qaytdi. Mazkur ekspozitsiya qadimiy ramzlar, mifologik syujetlar va o‘ziga xos fantastik obrazlar uyg‘unligi orqali insonning hayotiy yo‘li hamda o‘zligini anglash mavzulariga bag‘ishlangan.
Rassomning so‘zlariga ko‘ra, bu safar uning uchun xotiralardagi qadrdon shahar bilan bugungi o‘zgargan Toshkentning o‘ziga xos uchrashuviga aylandi. U oxirgi marta O‘zbekistonda 2009 yilda bo‘lgan edi. O‘tgan davr mobaynida poytaxt sezilarli darajada yangilanib, keng ko‘chalar va zamonaviy binolar qad rostlagan, biroq shahar o‘zining azaliy yashilligi va betakror muhitini saqlab qolgan. D’Vats o‘tmish xotiralari bugungi taassurotlar bilan qorishib, yangi ijodiy g‘oyalarni berishini alohida ta'kidlab o‘tdi.
Ko‘rgazmaning ochilishi galereya asoschisi Natalya Andakulova uchun ham ramziy ma'noga ega bo‘ldi. Ma'lum qilinishicha, bundan 13 yil muqaddam Dubayda Andakulova Gallery aynan Timur D’Vatsning asarlari bilan o‘z faoliyatini boshlagan edi. Endilikda ushbu hamkorlik rassomning ijodiy kamolotida muhim o‘rin tutgan Toshkent shahrida davom ettirilmoqda. Bu esa nafaqat muallif, balki galereyaning o‘zi uchun ham asl ildizlarga qaytish lahzasi bo‘ldi.
Timur D’Vats uchun Toshkent hamisha alohida ahamiyatga ega bo‘lgan. U shu yerda ulg‘ayib, Pavel Benkov nomidagi Respublika rassomchilik bilim yurtida ilk professional ta'limni olgan. Keyinchalik uning hayoti Moskva va London orqali o‘tib, u yerda qirollik akademiyasida tahsil oldi. Hozirda uning asarlari dunyoning nufuzli shaxsiy kolleksiyalarida, jumladan, Buyuk Britaniya qirollik oilasi va Yaqin Sharq monarxlari to‘plamlarida saqlanib kelmoqda.
Ekspozitsiyadan o‘rin olgan asarlarda vizantiya ikonalari va pre-rafaelitlar san'atining ta'siri yaqqol seziladi. Rassom oltin rang, qizil tuye hamda cho‘ziq shakllar yordamida inson ruhining yuksaklikka intilishini ko‘rsatishga harakat qilgan. Ko‘rgazma joriy yilning 18 noyabriga qadar davom etishi rejalashtirilgan.
Source: podrobno.uz