Xitoy Savdo vazirligi AQShning mudofaa sektori bilan bog‘liq 10 ta kompaniyasiga qarshi javob sanksiyalarini joriy qildi. Ushbu kompaniyalarga Xitoyning ikki tomonlama maqsadli mahsulotlarini, shu jumladan uchinchi davlatlar orqali yetkazib berish taqiqlandi.

Shu bilan birga, Xitoy Moliya vazirligi davlat tuzilmalariga Lockheed Martin, Raytheon va General Dynamicsning bo‘linmalarini o‘z ichiga olgan 46 ta Amerika firmasining mahsulotlarini xarid qilishni taqiqladi. Pekin bu qadamni AQSh Mudofaa vazirligining iyun oyi boshida Alibaba va Baidu texnologik gigantlarini harbiy kompaniyalar ro‘yxatiga kiritib, ularni Amerika mudofaa shartnomalaridan mahrum qilganiga javoban qildi.

Xitoy rasmiylari AQSh sanksiyalari Si Szinpin va Donald Trampning may oyidagi kelishuvlarini buzayotganini ta’kidladi. Yangi cheklovlar Amerika uchuvchisiz samolyotlari ishlab chiqaruvchilari, aerokosmik sektor va xomashyo qazib olishga ta’sir ko‘rsatdi.

Bloklangan 10 ta korxona ro‘yxatiga og‘ir harbiy yuk mashinalari va bronetransportyorlar ishlab chiqarishi bilan mashhur Oshkosh Defense, shuningdek, "Jeyms Uebb" kosmik teleskopi uchun optika yaratgan Ball Aerospace & Technologies kirdi. Shuningdek, AQShda nodir yer metallari qazib olishni nazorat qiluvchi MP Materials va USA Rare Earth kompaniyalari ham sanksiyalar ostiga olindi.

Mutaxassislarning fikricha, sanksiyalar ko‘p jihatdan ramziy xususiyatga ega, chunki bu mudofaa korxonalari Xitoyda to‘g‘ridan-to‘g‘ri biznes yuritmaydi. Biroq, Pekinning bu qadami ularning global ta’minot zanjirlarini murakkablashtirishi mumkin.

Source: podrobno.uz