O‘zbekiston Prezidenti Shavkat Mirziyoyev Sergeli tumanidagi Global International Hospital ko‘p tarmoqli tibbiyot markaziga tashrif buyurdi. Ushbu tashrif davomida davlat rahbari tibbiy turizmni rivojlantirish maqsadida shifoxonalar qoshida mehmonxonalar qurish tashabbusini ilgari surdi.

Prezident matbuot xizmati ma’lumotiga ko‘ra, markaz qurilishiga 30 million dollar sarmoya kiritilgan. Muassasa yiliga 150 mingdan ortiq bemorga xizmat ko‘rsatish imkoniyatiga ega bo‘lib, uning hududida 250 ta ish o‘rni yaratilgan. Markazda xorijiy shifokorlar va chet elda malaka oshirgan o‘ndan ortiq mutaxassis faoliyat yuritmoqda.

Prezident jarrohlik, reanimatsiya va davolash bo‘limlari hamda situatsion markazni ko‘zdan kechirdi. Davlat rahbari tibbiy va turistik xizmatlarni uyg‘unlashtirish muhimligini ta’kidlab, xorijiy tajribani o‘rganish va shifoxonalar qoshida mehmonxona infratuzilmasini rivojlantirish bo‘yicha topshiriqlar berdi.

“Har bir bemorga sifatli va munosib xizmat ko‘rsatish bilan birga, tibbiy va turistik xizmatlarni uyg‘unlashtirish zarur. Bu yo‘nalishni keng targ‘ib qilish, xorijiy tajribani o‘rganish va shifoxonalar qoshida mehmonxona infratuzilmasini rivojlantirish kerak”, – dedi davlat rahbari.

Prezident markazni ayrim yo‘nalishlar bo‘yicha tayanch muassasaga aylantirish va aholini zamonaviy xizmatlar bilan qamrab olishni kengaytirishni topshirdi.

Shundan oldin Shavkat Mirziyoyev Sergeli tumanidagi “Ittifoq” mahallasida joylashgan Yangi Sergeli ko‘chasiga tashrif buyurib, amalga oshirilgan ishlar hamda savdo va xizmat ko‘rsatish ob’ektlari faoliyati bilan tanishdi.

Source: podrobno.uz