Mamlakatimizda Oʻzbek tili bayrami kuni munosabati bilan davlat rahbari Shavkat Mirziyoyev oʻz tabrik yoʻllab, ona tilimizning jamiyat hayotidagi oʻrni, taʼlim sifati, ilm-fan va raqamli texnologiyalar sohasidagi oʻrniga alohida toʻxtalib oʻtdi. Taʼkidlanishicha, davlat tiliga boʻlgan hurmat birinchi navbatda davlat xizmatining sifatida namoyon boʻlishi lozim, bu esa fuqarolar bilan muloqotni yanada yaxshilashni talab etadi.

Shuningdek, rasmiy idoralar faoliyatida til masalasiga jiddiy eʼtibor qaratilib, qonunlar, qarorlar, yoʻriqnoma va fuqarolardan tushgan murojaatlarga javoblar ravon, aniq hamda tushunarli tilda yozilishi shartligi qayd etildi. Fuqarolar rasmiy hujjatlar mazmunini oʻqib tushunishda hech qanday ortiqcha qiyinchilikka duch kelmasligi, idoralar bilan muloqotda oʻz huquq va majburiyatlarini toʻlaqonli anglashi muhimligi koʻrsatib oʻtildi.

Taʼlim sohasida esa oʻquvchilarning oʻqish, tushunish, gapirish va savodli yozish koʻnikmalarini rivojlantirish asosiy vazifa sifatida belgilandi. Bunda tilni oʻrganish faqat quruq grammatik qoidalarni yodlashdan iborat boʻlmasligi, balki matnni chuqur tushunish va oʻz fikrini erkin ifoda etishga qaratilishi kerakligi aytildi. Shuningdek, ona tili sifatida va davlat tili sifatida oʻrganayotgan bolalarning ehtiyojlari turlicha ekanligini hisobga olib, darsliklar hamda oʻqitish usullarini yanada takomillashtirish zarurligi uqtirildi.

Ilm-fan va zamonaviy texnologiyalar yoʻnalishida oʻzbek tilidagi ilmiy manbalarni koʻpaytirish, sunʼiy intellekt imkoniyatlarini kengaytirish va sifatli tarjimalarni yoʻlga qoʻyish dolzarb vazifa ekani taʼkidlandi. Tibbiyot, muhandislik, iqtisodiyot kabi muhim sohalarda ishonchli adabiyotlar hamda elektron resurslarga boʻlgan ehtiyojni qondirish ishlari jadallashtirilishi lozimligi qayd etildi.

Source: kun.uz