Samarqand viloyatining Jomboy tumanida mansabdor shaxsning noqonuniy harakatlari fosh etildi. Tuman ekologiya va atrof-muhitni muhofaza qilish bo‘limi boshlig‘i sifatida ishlab kelgan 39 yoshli J.R. noqonuniy ravishda daraxt kesilishi bilan bog‘liq holatni yashirish evaziga pora talab qilgani ma'lum bo‘ldi. Ma'lumotlarga ko‘ra, u Zarafshon mahallasida yuzaga kelgan yirik qonunbuzarlikka ko‘z yumishni rejalashtirgan.

Sud hujjatlarida keltirilishicha, mazkur mansabdor shaxs tuman hududida 100 tupga yaqin terak noqonuniy ravishda kesilganiga qaramay, bu holat yuzasidan chora ko‘rmaslikni va'da qilgan. Shuningdek, u tabiatga yetkazilgan zarar miqdorini kamaytirib ko‘rsatish hamda ushbu huquqbuzarlikda qatnashgan yuk mashinasini jarima maydonchasidan chiqarib berish evaziga 11 million so‘mlik monoblok (kompyuter jamlanmasi) talab qilgan. Huquqni muhofaza qiluvchi organlar tomonidan o‘tkazilgan tezkor tadbir davomida u so‘ralgan jihozni o‘z xizmat xonasida qabul qilib olayotgan vaqtida qo‘lga olingan.

Sud jarayonida sobiq mulozim o‘z aybiga iqrorlik bildirgan, biroq kompyuter jamlanmasini shaxsiy manfaat uchun emas, balki ishxonasiga kerak bo‘lgani uchun so‘raganini vaj qilib ko‘rsatgan. Uning so‘zlariga ko‘ra, daraxt kesayotgan shaxslarning tanishi unga pul taklif qilgan, biroq u puldan voz kechib, ishxona uchun texnika olib berishni talab qilgan. Shunga qaramay, tergov va sud idoralari uning qilmishini pora olish sifatida malakaladi.

Jinoyat ishlari bo‘yicha Jomboy tuman sudining hukmi bilan J.R. Jinoyat kodeksining 210-moddasi (pora olish) 1-qismida nazarda tutilgan jinoyatni sodir etishda aybdor deb topildi. Unga nisbatan muayyan muddatga davlat ishtirokidagi tashkilotlarda mansabdorlik va moddiy javobgarlik yuklatilgan lavozimlarda ishlash huquqidan mahrum qilgan holda 5 yil muddatga ozodlikdan mahrum qilish jazosi tayinlandi.

Source: kun.uz