2025-yil sentabr oyida Toshkent viloyatidagi bog'chalarda bolalarning ommaviy zaharlanishi holati bo'yicha qo'zg'atilgan jinoyat ishi Bo'ka tuman sudiga kelib tushdi. Oliy sud matbuot kotibi Aziz Obidovning xabariga ko'ra, sud ishiga 11 kishi jalb qilingan. Ular bolalar bog'chalari uchun mahsulot ishlab chiqarish, yetkazib berish va xizmat ko'rsatish bilan bog'liq kompaniyalarda rahbarlik va texnik lavozimlarda ishlagan shaxslardir.

Ayblanuvchilar Jinoyat kodeksining 186-moddasi 4-qismi "b" bandi va 257-1-moddasi 1-qismi bo'yicha ayblanmoqda. Ularning 10 nafariga qamoqqa olish, 1 nafariga uy qamog'i tarzidagi ehtiyot choralari qo'llangan.

2025-yil 25-sentabrda 1922 nafar bola zaharlanish alomatlari bilan viloyat shifoxonalariga yotqizilgan. Tergov natijalariga ko'ra, zaharlanishga Shark Milk Product kompaniyasining kefir mahsuloti sabab bo'lgan bo'lishi mumkin. Viloyatning Bo'ka, Piskent, Bekobod, Oqqo'rg'on va Quyi Chirchiq tumanlaridagi bog'chalarga uchta autsorsing kompaniyasi xizmat ko'rsatgan, ularning barchasi sut mahsulotlarini Shark Milk Product'dan sotib olgan.

Shunga o'xshash holat 2021-yilda Oqqo'rg'on tumanida ham yuz bergan, o'shanda 25 nafar bola jabrlangan edi. Shark Milk Product o'sha vaqtda ham Oqqo'rg'on tuman maktabgacha ta'lim bo'limiga sut mahsulotlari yetkazib bergan.

Source: www.gazeta.uz