Falastinning G‘arbiy Sohildagi Beyta shahri yaqinida an'anaviy zaytun yig‘im-terimi mavsumi dahshatli voqealar va zo‘ravonliklar soyasida o'tmoqda. Mahalliy aholi vakili Musa Bani Shamsa va uning 17 yashar o'g'li o'z yerlariga borganida, niqobli isroillik ko'chmanchilar ularga hujum qilishgan. Jabrlanuvchining so'zlariga ko'ra, qurollangan shaxslar ularni ayovsiz kaltaklab, hushidan ketkazguniga qadar o'lim holatiga keltirishgan. Ushbu hodisa mintaqada yuz berayotgan tizimli zo'ravonliklar va bosimning navbatdagi ko'rinishi ekanligi aytilmoqda.

Birlashgan Millatlar Tashkilotining Gumanitar masalalarni muvofiqlashtirish boshqarmasi ma'lumotlariga ko'ra, joriy yilning 1-sentabridan buyon falastinlik dehqonlarga nisbatan 200 tadan ortiq hujum qayd etilgan. Bu o'tgan yilgi butun mavsum davomidagi ko'rsatkichdan ham yuqori ekani ta'kidlanmoqda. Isroil rejimi ko'chmanchilari tomonidan sodir etilayotgan bunday jinoyatlar oqibatida mahalliy aholi o'z yerlarini tashlab ketishga majbur bo'lmoqda yoki o'ta xavfli sharoitda hosil yig'ishga harakat qilmoqda.

Mutaxassislarning fikricha, bu jarayonlar ortida hududni egallash va falastinliklarni siqib chiqarish siyosati yotibdi. Isroil rejimining moliyaviy va huquqiy ko'magida kengayib borayotgan noqonuniy posyolkalar va forpostlar mahalliy aholining yashash sharoitini izdan chiqarmoqda. Xalqaro huquq normalariga zid ravishda barpo etilayotgan bunday inshootlar hududdagi nazoratni kuchaytirish vositasi sifatida qo'llanilayotgani taxmin qilinadi.

Jabrlangan dehqonlar va huquq faollarining ta'kidlashicha, Isroil rejimi huquq-tartibot idoralari va armiyasi bu kabi zo'ravonliklarga ko'z yumib, hatto ularni qo'llab-quvvatlab kelmoqda. Sudga berilgan shikoyatlarning aksariyati natijasiz yakunlanib, aybdorlar jazosiz qolayotgani mahalliy aholining adolatga bo'lgan ishonchini butunlay yo'qqa chiqarmoqda.

Source: www.aljazeera.com